|
|
| 后一頁 前一頁 回目錄 |
按：周雙玉踅進對過自己房里，巧囡跟過來問雙玉道：“出局衣裳，無(女每)阿曾撥來耐？”雙玉搖搖頭。巧囡道：“我去搭耐問聲看。耐拿鬢腳來刷刷囗。”說了，忙下樓去問老鴇周蘭。雙玉自把保險台燈移置梳妝台上，且不去刷鬢腳，就在床沿坐下，悄悄的側耳而听。 原來周雙玉房間底下乃是老鴇周蘭自己臥室，那周雙寶搬下去舖的房間卻在周雙珠的房間底下。當時听得老鴇周蘭叫巧囡掌起燈來，開櫥啟箱，翻騰一會；又咕咕唧唧說了許多閒話，然后出房；卻又往雙寶房背后去，不知做什么，一些也听不見。 雙玉方才丟開，起身對鏡，照見兩邊鬢腳稍微松了些，隨取抿子輕輕刷了几刷，已自熨貼。只見巧囡怀里抱著衣裳，同周蘭上樓來了。雙玉收過抿子，便要取衣裳來穿。周蘭道：“慢點嗄，耐個頭勿好（口宛），啥毛得來。”乃將手中揣著的豆蔻盒子放下，親自動手替雙玉弄頭。捏了又捏，撳了又撳，濃濃的蘸透了一根子刨花浸的水，順著螺絲旋刷進去，又刷過周圍劉海頭。刷的那水從頭頸里直流下去，連前面額角上也亮晶晶都是水漬。雙玉伸手去拭，周蘭忙阻止道：“耐（要勿）動囗。”遂用手巾在頭頸里略掩一掩，叫雙玉轉過臉來，仔細端詳一回，說：“好哉。” 巧囡在傍提著衣裳領口，伏侍雙玉穿將起來，是一件織金撇蘭盆景一色鑲滾湖色宁綢棉襖。巧囡看了道：“實概件衣裳，我好像勿曾看見歇。”周蘭道：“耐末陸里看得見？說起來還是大先生個哉。俚□姊妹三家頭，才有點怪脾气。隨便啥衣裳哉，頭面哉，才要自家撐得起來；別人個物事，就撥來俚，俚也匆要。雙珠個頭面末，也匆算少。單說衣裳，是陸里及得來阿大搭阿二嗄？比仔雙珠要多几花□！俚□嫁出去辰光，揀中意點末拿仔去，剩下來也有几箱子。我收捉仔起來，一直用勿著，還有啥人來著囗？就撥來雙寶著過歐，也匆多几件。還有几几花花，連搭雙寶也匆曾看見歇，（要勿）說啥耐哉。” 雙玉穿上棉襖，向大洋鏡前走了几步，托起臂膊，比比出手。周蘭過去把衣襟縐紋拉直些，又嘮叨說道：“耐要自家有志气，做生意末巴結點，阿曉得？我眼睛里望出來，無啥親生勿親生，才是我囡仵。耐倘然學得到雙珠阿姐末，大先生、二先生几花衣裳頭面，隨便耐中意陸里一樣，只管拿得去末哉。要像仔雙寶樣子，就算是我親生囡仵，我也匆高興撥俚（口宛）。”雙玉只听著不言語。周蘭問他：“阿听見？”雙玉說：“听見哉。”周蘭道：“价末耐也答應聲囗，啥一聲也匆響嗄？” 巧囡听台面上叫的局先已到了，急取豆蔻盒子，連聲催促，方剪住周蘭的話頭，攙了雙玉，往前便走，卻忽然想起銀水煙筒來。巧囡道：“就三先生搭拿仔根罷。”周蘭道：“勿要！耐到雙寶搭去拿得來。雙寶一根末讓俚用仔，我再拿一根出來撥來雙寶。” 巧囡赶著跑去。周蘭又教導些台面規矩与雙玉听，并說：“耐勿曉得末，問阿姐好哉。阿姐搭耐說啥閒話，耐听好仔，（要勿）忘記。耐要是匆肯听人閒話，我先搭耐說一聲，耐自家吃苦，到底無啥好處。”周蘭說一句，雙玉應一聲。須臾，巧囡取銀水煙筒回來，周蘭自下樓去。 巧囡忙挈雙玉至這邊台面上。只見先到的只有一個局，乃是陳小云的相好金巧珍，住在同安里口，只隔一條三馬路，走過來就是，所以早些。當時金巧珍拉開嗓子唱京調，引得羅子富興高采烈，擺庄豁拳。更有趙朴齋、張小村刻意奉承，极力鼓舞，此外諸位也就隨和著。獨有王蓮生設精打采，坐也坐不住。周雙珠知道是厭煩，問他：“阿到對過去坐歇？”蓮生正中胸怀，即時离席。 巧囤領著踅過周雙玉房間，點了煙燈，沖了茶碗。向蓮生道：“我去喊雙玉來。”蓮生阻擋不及，只好听他喊去。只見周雙玉冉冉歸房，脫換衣裳，遠遠的端坐相陪，嘿然無語。蓮生自然不去兜搭。一會儿，巧囡又跑來張羅，叮囑雙玉陪著，也就去了。 蓮生吸了兩口煙，听那邊台面上豁拳唱曲，熱鬧得不耐煩，倒是雙玉還靜靜的坐在那里低頭斂足弄手帕子。蓮生心有所感，不覺暗暗贊歎了一番。忽听得娘姨阿金走出當中間，高聲喊“絞手巾”。一時，履聲、舄聲、帘鉤聲、客辭主人聲、主人送客聲，雜沓并作。卻不知去的是誰，只覺得台面上冷靜了許多。隨后湯嘯庵也踱過這邊房里來，吃得緋紅的臉，一手拿著柳條剔牙杖剔牙，隨意向榻床下首歪著，看蓮生燒煙。蓮生問：“子富去哉？”嘯庵道：“俚□還有啥局頭，搭仲英、小云一淘去哉。” 蓮生遂約嘯庵同洪善卿到沈小紅家去。嘯庵會意應諾。及巧囡來請用飯，兩人方過那邊歸席人座。湯嘯庵向洪善卿耳邊說了几句，善卿听了微笑。用雙珠也點頭笑道：“耐□說啥，我也懂來里哉。”嘯庵道：“耐說說看。”雙珠把嘴望蓮生一努。大家笑著，都吃過飯。張小村知道他們有事，和趙朴齋告辭先行。王蓮生道：“倪也去罷。”湯嘯庵、洪善卿說“好”。周雙珠忙喊雙玉過來，送至樓門而回。 三人緩步同行。來安叫轎夫抬空轎子跟隨在后，出了公陽里，就對門進同安里，穿至西薈芳里口，适被娘姨阿珠的儿子暗中瞧見，跑去報信。阿珠迎出門首，笑嘻嘻說道：“我說王老爺要來快哉，倒剛剛來哉。” 當下王蓮生在前，与湯嘯庵、洪善卿進門；后面跟著阿珠，接踵上樓。早听得房間里小腳高底一陣怪響。王蓮生方跨進當中間房門，只見沈小紅越發蓬頭垢面，如鬼怪一般，飛也似赶出當中間，望蓮生縱身直扑上去。蓮生錯愕倒退。大姐阿金大隨后追到，兩手合抱攏來，扳住小紅胸脯，只喊說：“先生（要勿）囗！”慌的阿珠搶上去叉住小紅臂膊，也喊說：“先生耐慢點看！”小紅咬牙切齒，恨道：“耐□走開點囗！我要死末關耐□啥事嗄？”阿珠連連勸道：“耐就要死末，也匆實概個（口宛）。故歇王老爺來仔，也好等王老爺說起來；說勿好，耐再去死末哉（口宛）。”小紅一心和蓮生拼命，那里肯依。湯嘯庵、洪善卿見如此撒潑，不好說甚，只是冷笑。蓮生又羞又惱，又怕又急，四下里一逼，倒逼出些火性來，也冷笑說道：“讓俚去死末哉！”說了一句，回身便走。湯嘯庵、洪善卿只得跟著走了。 阿珠見光景不好，也顧不得小紅，赶緊來拉蓮生；被蓮生一豁，洒脫袖子，竟下樓梯。忽听得當中間板壁“蓬咚蓬咚”震天价響起來，阿金大在內极聲喊道：“勿好哉，先生撞煞哉呀！”就這一聲喊里，喚起樓下三四個外場，只道有甚禍事，急急跑上樓來，适与蓮生等擠住在樓梯上。阿珠把蓮生死拖活拽，往里掙去。湯嘯庵、洪善卿料道走不脫，也攛掇蓮生回至當中間。只見小紅還把頭狠命往板壁上磕，阿金大扳住胸脯，那里扳得開。阿珠著了忙，也狠命的攔腰一抱抱起來。湯嘯庵、洪善卿齊說道：“小紅耐算啥囗？有閒話說末哉，實概樣子，耐小紅也犯勿著（口宛）。”阿珠摸摸小紅的頭，沒甚傷損，只有額角邊被板壁上釘的釘頭碰破些油皮，也不至流血。阿金大上前把手心摩挲著，道：“耐看阿險嗄！撞來□太陽里末，那价呢？” 蓮生正站在一傍發呆。阿珠一眼□見，說道：“王老爺，闖出窮禍來，耐也脫勿了個囗！（要勿）看仔像無要緊。”外場見沒事，都笑道：“倒嚇得倪來要死！快點攙先生房間里去罷。”阿珠仍抱起小紅來。阿金大拉了蓮生、湯嘯庵、洪善卿一同簇擁至房里。阿珠放小紅向榻床躺下。阿金大端整茶碗，叫外場沖了茶。外場囑付阿珠說：“耐□小心點末哉。”都訕笑著下樓去了。 王蓮生、湯嘯庵、洪善卿一溜儿坐在靠壁高椅上。小紅背燈向壁，掩面而哭。阿珠靠小紅身傍坐著，慢慢与王蓮生說道：“王老爺，耐自家勿好，轉差仔念頭。耐起初要搭倪先生說明白仔，耐就去做仔十個張蕙貞，优先生也無啥（口宛）。為仔耐瞞仔倪先生末倒勿好哉。倪先生曉得耐去做仔張蕙貞，說難是王老爺倪搭匆來個哉，撥來張蕙貞□拉仔去哉。”洪善卿不待說完，即攔說道：“王老爺不過昨日夜頭來□張蕙貞搭吃仔台酒二故歇原到該搭來哉（口宛）。”阿珠立起身來，走過洪善卿身傍，輕聲說道：“洪老爺，耐是蠻明白來里。倪先生倒（要勿）怪俚，俚是發极仔了呀。王老爺先起頭做倪先生辰光，還有好几戶老客人□。后來搭王老爺要好仔末，有個把客人阿要動气匆來哉了？倪末去請哉（口宛）。王老爺就搭倪先生說：‘俚□匆來，讓俚吸匆來末哉，我一干仔來搭耐撐場面。’王老爺，阿是耐說來□個閒話？先生有仔王老爺，倒蠻放心請也匆去請哉。難末一戶一戶客人才匆來哉，到故歇是無撥哉，就剩仔王老爺一干仔哉。洪老爺，耐說王老爺去做仔張蕙貞，倪先生阿要發极？”湯嘯庵接說道：“難也（要勿）去說哉。張蕙貞□末坍仔台哉，王老爺原到該搭來，耐沈小紅場面也可以過得去哉。大家（要勿）說哉，阿是？” 小紅正哭得涕淚交顧，听嘯庵說，便分說道：“楊老爺，耐問聲俚看：俚自家搭我說，教我生意（要勿）做哉，條子末手孝脫仔。我听仔俚，客人叫局也匆去。俚還搭我說，俚說：‘耐少來□几花債末，我來搭耐還末哉。’我听仔快活煞，張開仔兩只眼睛單望俚一干仔，望俚搭我還清仔債末，我也有仔好日腳哉。陸里曉得俚一直來里騙我！騙到我今日之下，索性豁脫仔，去包仔個張蕙貞囗！”說到這里，兩腳一跺，身子一掀，俯仰號啕，放聲大哭。哭了又道：“俚就要去做張蕙貞，也無啥！我自家想想，衣裳末著完哉，頭面末當脫哉，客人末一個也無撥哉，倒欠仔一身債。弄得我上勿上，落勿落，難末教我那价囗？”湯嘯庵微笑道：“故也無啥那价。王老爺原來里，衣裳頭面原教王老爺辦得來，債末教王老爺去還清仔，阿是才舒齊哉（口宛）？” 小紅道：“湯老爺，勿瞞耐說，王老爺來里該搭做仔兩年半，買來□几花物事才來里眼睛前頭。張蕙貞搭勿到十日天，從頭浪起到腳浪，陸里一樣勿搭俚辦起來？還有朋友歎拍馬屁鬼討好，連忙搭俚買好仔家生送得去舖房間。耐湯老爺陸里曉得囗！”洪善卿插說道：“王老爺也叫瞎說！堂子里做個把倌人，只要局帳清爽仔末是哉。倌人欠來□債，關客人啥事，要客人來搭俚還。老實說，倌人末勿是靠一個客人，客人也匆是做一個倌人。高興多走走，勿高興就少走走，無啥多花枝枝節節（口宛）！” 小紅正要回嘴，阿珠赶著戧說道：“洪老爺說得勿差，‘倌人末勿是靠一個客人’。倪先生也有好几戶客人□，為啥要耐王老爺一干仔來撐場面囗，耐就一干仔撐仔場面，匆來搭倪先生還債，倪先生就欠仔一万債，阿好搭耐王老爺說，要耐王老爺來還嗄？耐王老爺自家搭倪先生說，要搭倪先生還債。只要王老爺真真還清仔，倪先生阿有啥枝枝節節？耐就去做仔張蕙貞，‘客人也匆是做一個倌人’，倪先生阿好說耐啥？故歇耐王老爺原勿曾搭倪先生還歇一點點債，倒先去做仔張蕙貞哉。耐王老爺想想看，阿是倪先生來里枝枝節節呢？阿是耐王老爺自家來□枝枝節節？”說罷，（目夷）了王蓮生半日。 蓮生仰著臉，只不做聲。洪善卿笑道：“俚□啥枝枝節節也勿關倪事，倪要去哉。”遂与湯嘯庵立起身來。蓮生意思要一同去，小紅只做不看見，倒是阿金大捺住蓮生道：“咦！王老爺，耐阿好去嗄？”阿珠喝阿金大放手，卻向蓮生道：“王老爺耐要去，去末哉；倪是匆好來屈留耐，就搭耐說一聲是哉。昨日夜頭我搭阿金大兩家頭陪倪先生坐來□床浪，坐仔一夜天勿曾困，今夜頭倪要因去哉。倪娘姨□到底無啥干己，就闖仔點窮禍，也匆關倪事。倪先說仔末，王老爺也怪勿著倪。”几句說得蓮生左右為難，不得主意。湯嘯庵向蓮生道：“倪先去，耐坐歇罷。”蓮生乃附耳囑他去張蕙貞家給個信。嘯庵應諾，始与洪善卿偕行。小紅卻也抬身送了兩步，說道：“倒難為仔耐□，明朝倪也擺個雙台謝謝耐□末哉。”說著，倒自己笑了。蓮生也忍不住要笑。 小紅轉身，伸一個指頭向蓮生臉上連點几點，道：“耐末……”只說得兩字，便縮住了，卻“哼”的一聲，像是歎气。半晌又道：“耐一干仔來末，阿伯倪欺瞞仔耐嗄？耐算教兩個朋友來做幫手，幫仔耐說閒話，阿要气煞人！”蓮生自覺羞慚，佯作不睬。阿珠冷笑兩聲，道：“王老爺倒蠻好，才是朋友□搭俚出個主意。王老爺末去听仔俚。就張蕙貞搭，勿是朋友同得去，陸里認得嗄？”小紅道：“張蕙貞搭倒勿是朋友，俚乃自家去打個野雞。”阿珠道：“故歇是匆是野雞哉，也算仔長三哉！叫仔一班小堂名，顯煥得來！王老爺做仔几日天，用脫仔几花？阿有千把嗄？”蓮生道：“耐□（要勿）瞎說！”阿珠道：“倒勿是瞎說囗！”隨將煙盤收拾干淨，道：“王老爺吃煙罷，（要勿）去轉啥念頭哉！”蓮生乃去榻床躺下吸煙。阿珠、阿金大陸續下去。 第十回終。 ------------------ 亦凡公益圖書館掃校 |
后一頁 前一頁 回目錄 |
|
|